stubella
Stuba, Officina, cœnatiuncula. Chron. Mellic. pag. 426. col. 2 :
Laici sartores sint deinceps semper extra monachorum clausuram in Stubella ex
opposito sutorum. Ibidem pag. 439. col. 1 : In illo monasterio
(Formbac.) nostris temporibus fuit quædam Stubella lignea annexa cuidam
palatio, in qua quodam tempore sedit abbas illius loci cum sex fratribus, nescio si in
aliquo consilio, vel comessatione, et illa Stubella fuit directe supra navigabilem
fluvium, qui dicitur Enus, et comparatur Danubio. Subito cecidit Stubella ad fluvium cum
prædicto abbate et monachis, et Domino dirigente in casu quilibet manibus apprehendit
aliquid, in quo se sustentaret, unus ferramentum fenestræ, alter unum scamnum, et sic de
aliis, et fundus Stubellæ mersus fuit, Stubella quasi navis descendit versus
Pataviam.